Psa 140 | MMX | STEP | Leeme Silok, una lox asepsu ia basinge limixin kapmek; una lok tatao avukat ia basinge limixin sepsep.

Psalms 140

Lisingising Ti Loklok Tatao

1 Leeme Silok, una lox asepsu ia basinge limixin kapmek; una lok tatao avukat ia basinge limixin sepsep. 2 Nedi di rivit li nemnem amisik leveloklok kakapmek, la dik paxaru kaxat amisik leegang. 3 Leven gam atdi ik lok ngan lempat sii angkang la levelinga atdi ik lok ngan lasak at lavatmoora.

4 Leeme Silok, una xok ia basinge lolos at limixin kapmek; una lok tatao ia basinge limixin sepsep ua digam nem mu ia xusu dina lox asubu ia. 5 Limixin loklok aaso dira li vam lelixo ria, dira saga vam lengkutkut atdi, la dira lii laxam pelixo ro at langas kusu ri lixo xaka ia.

6 Na a vaase ru Leeme Silok keretna, “Nenu ne Moroa rak. Leeme Silok, una ronga lerengteng tarak kusu ri loklok tooro ram! 7 Loorong Avolo, nenu Leeme Silok tarak, la nenu lentupe lolos tarak. Ugarak lok tatao avukat pam ia keneng at leven esep. 8 Leeme Silok, nemen gat utam taba nedi limixin kapmek mi mo lempanga ua nedi di vavara rin; la nemen uta ke avolo mo leven doxoma nemnem atnedi xusu na soorun.

9 Uguta ke mo lavamunepen tarak dinak sak tup minia; ketla una see antan mo loklok dik lox i ria, nabamlong mu di. 10 A vara i do una lox asu laxali kao bokbolot na subu mavana atdi; la una lu arup midi ro xeneng at lemeroon kusu dinoxo eng su bok ba. 11 A vara i do nedi mo dik sok taba lentaba vetpes mi levelinga xaxarang, di noxo lox epovo tekot; la a vara i do laxapmek na suxuna limixin sepsep, la na sev amet di.

12 Leeme Silok, aklen i do nenu u tu see at limixin banbalo, la u tu ri luvukat atnedi dik pakes. 13 I ruturun tinotno do limixin mokmokso dinaba emi asu minu, la dinaba nemen maxopok at loklok tatao ram.